கோவிந்தசாமி சுந்தராம்பாள் என்னும் கோ.சுந்தராம்பாள் புலவரில் பூத்து முனைவரில் கனிந்தவர். எளிய வேளாண் குடும்பத்தில் பிறந்து அரசுப் பள்ளிகளின் தாழ்வாரத்தில் தவழ்ந்து சுயமுயற்சியால் உயர்பட்டங்களைப் பெற்றவர். மாணவப் பருவத்தில் பல்வேறு போட்டிகளில் பரிசுகள் பல பெற்றவர். ‘யாப்பருங்கலக்காரிகையில் அடைச்சொற்களும் விதப்புக்கிளவிகளும்’ என்னுந் தலைப்பில் ஆய்வியல் நிறைஞர் பட்டத்தைப் பெற்ற இவருடைய முனைவர்ப் பட்ட ஆய்வு “தொல்காப்பியச் சொல்லதிகார உரைகள் - ஓர் ஒப்பியல் ஆய்வு (சேனாவரையம் – நச்சினார்க்கினியம்)” என்பதாகும். தஞ்சை நாட்டார் திருவருள் கல்லூரியின் நாற்றங்காலில் வளர்ந்த இவர், தஞ்சை பான் செக்கர்ஸ் மகளிர் கல்லூரியில் மூன்றாண்டுகள் (2019-2022) உதவிப் பேராசிரியராகப் பணிபுரிந்திருக்கிறார். ஐம்பதுக்கும் மேற்பட்ட ஆய்வுக்கட்டுரைகளை வழங்கியிருக்கும் இவர், கடந்த இருபது திங்கள்களாகப் பெரியார் மணியம்மை அறிவியல் மற்றும் தொழில்நுட்ப நிறுவனத்தில் (நிகர்நிலைப் பல்கலைக்கழகத்தில்) உதவிப் பேராசிரியராகப் பணி புரிந்து வருகிறார்.