மார்ச் 30-1924 முதல், வெற்றிவிழா நடைபெற்ற நவம்பர் 29-1925 வரை நடந்த போராட்டம் வைக்கம் போராட்டம். தந்தை பெரியார் ஏப்ரல் 13-1924இல் வைக்கம் சென்று போராட்டத்தில் கலந்து கொள்கின்றார். வைக்கம் போராட்டத்தில் தந்தை பெரியாரின் பங்களிப்பை இந்தக் கட்டுரை விரிவாகப் பேசுகிறது. வரலாற்று ஆய்வாளர் பழ.அதியமான் அவர்களின் வைக்கம் போராட்டம் என்னும் நூல், அவர் செய்தித்தாளில் அந்த நூலைப் பற்றி எழுதிய கட்டுரை, அவர் பி.பி.சி.க்கு அளித்த பேட்டி எனப் பலவகையிலும் பழ.அதியமான் அவர்களின் பங்களிப்பை இந்தக் கட்டுரை பயன்படுத்தி வைக்கம் போராட்டத்தினை விளக்குகிறது.

தந்தை பெரியார் வைக்கம் போராட்டத்தை ஆரம்பித்தவர் அல்லர், அந்தப் போராட்டத் தீ வலிமையாக எரிவதற்கும், வெற்றி பெறுவதற்கும் காரணமாக இருந்தவர் என்பதை இக்கட்டுரை சுட்டுகிறது. இந்தியாவில் இருக்கும் வைதிகர்களின் மனதில் இருக்கும் சாதி மனப்பான்மையை அவர்கள் காந்தியோடு நடத்திய உரையாடல் மூலமாகச் சுட்டுகிறது. காந்தியடிகள் நடத்திய பல சத்தியாக்கிரகப் போராட்டங்களுக்கு அடிப்படை வைக்கம் போராட்டம். அண்ணல் அம்பேத்கர் இயக்கங்களும், பெரியார் இயக்கங்களும் நடத்திய/நடத்தும் ஆலய நுழைவுப் போராட்டங்களின் முன்னோடி வைக்கம் போராட்டம் என்பதனை இக்கட்டுரை விரிவாக ஆதாரங்களோடு எடுத்து வைக்கின்றது.