இந்தியாவின் பன்முகக் கலாச்சாரத்தின், வாழ்வியலின் அத்தனை கூறுகளையும் ஆரிய மயமாக்கிய வரலாற்றுக்குள்ளே பெண் அடிமைத்தனம் என்பது கொடியதாக இருந்தது. சூத்திரர்களையும் பெண்களையும் அடிமைச் சிறையில் பூட்டி வைத்தது பற்றியும், அதை மாற்ற மேற்கொண்ட பல்வேறு முயற்சிகளைப் பற்றியும் இந்தக் கட்டுரை பேசுகிறது. இந்து சட்டத் தொகுப்பு மசோதாவிற்கு அம்பேத்கர் எப்படித் தலைவர் ஆக்கப்பட்டார் என்பதையும், மற்ற எதைக் காட்டிலும் இந்து சட்டத் தொகுப்பை அம்பேத்கர் ஈடு இணையற்றதாக ஏன் கருதினார் என்பதையும் இந்தக் கட்டுரை விளக்குகிறது. அம்பேத்கரின் பார்வைக்கும் நேருவின் பார்வைக்கும் இருந்த நுண்ணிய வேறுபாட்டை ஆராய்கிறது. இந்து சட்டத் தொகுப்பு (Hindu Code Bill) மசோதா முன்வைத்த முக்கிய அம்சங்கள் பற்றி எடுத்துரைக்கும் இந்தக் கட்டுரை, யார் யாரால் இந்தச் சட்டத் தொகுப்பு எதிர்க்கப்பட்டது என்பதையும், யார் யாரால் ஆதரிக்கப்பட்டது என்பதையும், இந்தியாவில் இருந்த அன்றைய இயக்கங்களின் பார்வைகளோடு எடுத்து வைக்கிறது. விடுதலையில் பெரியார் ஆதரவு கொடுத்து எழுதிய தலையங்கத்தை இந்தக் கட்டுரை ஆராய்கிறது. அம்பேத்கர் பதவி விலகியதையும் அதற்கான காரணங்களை அவர் விளக்கியதையும் மேலும் தொகுத்து ஆய்கிறது.