தந்தை பெரியாருடைய செயல்பாடுகளை உற்று நோக்கி, அவரின் அணுகுமுறையை உலகிற்கு உணர்த்துவதே இக்கட்டுரையின் நோக்கமாகும். கொள்கையைச் செயலாக்கப் பல்வேறு வழிமுறைகள் உண்டு. காலத்திற்கேற்ப, சூழலுக்கேற்ப, எதிரிகளின் வியூகத்திற்கேற்ப அணுகுமுறைகளை மாற்றவேண்டி வரும். தன் அணுகுமுறையைப் பெரியார், பகத்சிங்கின் 'நான் ஏன் நாத்திகன் ஆனேன்' என்னும் புத்தகத்தைத் தமிழில் மொழிபெயர்த்து வெளியிட்டதற்குப் பின்னர் தான் கைக்கொண்டாரா என்பதனை ஆய்வு நோக்கில் இக் கட்டுரை ஆராய்கிறது. உருசியாவிற்குச் செல்வதற்கு முன்பும், சென்று வந்த பின்பும், பெரியார் மேற்கொண்ட பொதுவுடமைப் பிரச்சாரத்தில் ஏற்பட்ட மாற்றத்தை நோக்கி, 'குடிஅரசு' இதழ் வழியான அணுகுமுறைகளை ஆய்கிறது.

'மாறுதல் குற்றமில்லை என்னும் கோட்பாடு' பெரியாரின் அணுகுமுறையாக விளங்கியதை விவரிக்கும் இக்கட்டுரை, சமூகத் துறையில், மதத் துறையில், அரசியல் துறையில், கல்வி-கலை இலக்கியத் துறையில், பொருளாதாரத் துறையில் என்று பல்வேறு அணுகுமுறைகளை நோக்குகிறது. ஒருநாளும் வன்முறையை ஆதரிக்கும் அணுகுமுறை ஏன் கொண்டதில்லை என்பதனையும் இக்கட்டுரை ஆய்கிறது. இயக்கம், இதழ்கள், இயக்கத்தவரின் குழந்தைகள் என்று பல்வேறு பெயர் சூட்டல்களில், பெரியாரின் அணுகுமுறையை ஆய்கிறது. பணத்தின் மீதான பெரியாரின் அணுகுமுறை, மொழியைப் பற்றிய அணுகுமுறை, பிறரைப் பாராட்டுவதில் பெரியாரின் அணுகுமுறை, போராட்ட அணுகுமுறைகளை ஆய்ந்து, மேலும், பத்திரிகை, பிரச்சாரம், வசவு எதிர்கொள்ளல், கருத்துரிமை, கருத்து மாறுபாடு கொண்டவர்களுடனான உறவு என்று பெரியாரின் பல்வேறு அணுகுமுறைகளை ஒப்பிட்டு, எல்லா அணுகுமுறைகளின் அடித்தளத்திலும், உண்மை என்கிற அடிநாதமே தந்தை பெரியாரின் ஆதார அணுகுமுறை என்று இக்கட்டுரை நிறுவுகிறது.