அன்பு ஈனும் ஆர்வம் உடைமை – அது ஈனும்
நண்பு என்னும் நாடாச் சிறப்பு

என்று ஐயன் வள்ளுவனும், அன்பு தான் ஆர்வத்தின் தூண்டுகோல் என்று அன்றே இந்த உளவியலைக் காட்டிச் சென்றார்.

சுயமரியாதை இயக்க நூற்றாண்டாக வீறுநடை போடும் இவ்வாண்டில், இனமானம் ஊட்டிய கருத்துக்கள் யாவும் பல ஆய்வுப் பொருண்மைகளாகப் பல்கிப் பெருகி, அறிவியல் முறையில் ஆய்விதழாக ஒளிர்வதைக் கண்டு, உள்ளபடியே உவகை கொள்கிறோம். சமூகநீதிப் பொருண்மையே நம் ஆய்விதழில் இது வரை அதிகமாக இடம் பெற்றுள்ளது.

நம் ஆய்வுத்தாள்கள், அறிவுப்புலத்தில் பேசப்பட்டும், மீளாய்வு செய்யப்பட்டும் உள்ளன. இக்கல்விப் பயணத்தில், புதிய கட்டுரையாளர்களும் பல்வேறு பல்கலைக்கழகங்களிலிருந்து இணைந்துள்ளனர். உடன் பயணித்து, பங்களிப்பு நல்கும் வாசகர்களாகிய உங்களுக்கே எம் அத்துணைப் போற்றுதல்களும்!

இவ்விதழ், 5 ஆய்வுக் கட்டுரைகளைத் தாங்கி வெளிவருகின்றது.

1.திராவிட மாதிரியின் அளவு சார் பார்வை
2.பண்டைத் தமிழ்நாட்டு x வடநாட்டு அரசியல் முறைகள்
3.மனித அறிவை வெல்லுமா செயற்கை நுண்ணறிவு?
4.தமிழரின் திருமணங்களும், சட்டத் தீர்ப்புகளும் தீர்வுகளும்
5.அறிவியல் மனப்பான்மையும் இந்திய ஒன்றியமும்

திராவிடப் புலமையைச் செதுக்கும் இந்தக் கல்விப் பயணத்தில் தொடர்ந்து பயணிக்க உங்கள் ஆதரவைக் கோருகின்றோம். ஆய்வுக் கட்டுரைகளை வாசித்து, உங்கள் கல்விப் புலத்தில் பகிர்ந்து மகிழ வேண்டுகின்றோம்.