இன்று கற்றோர் எண்ணிக்கையில் முதன்மை மாநிலமாக இருக்கும் கேரளா, சென்ற நூற்றாண்டில் வைதீக அடக்குமுறையின் களமாகப் பின்தங்கி இருந்தது. திருவிதாங்கூர் சமஸ்தானத்து மகாராஜாவின் விருந்தினராகச் சுவாமி விவேகானந்தர் 1892ல் திருவனந்தபுரத்துக்குச் சென்ற பொழுது, அங்கிருந்த மனிதநேயமற்ற பிற்போக்கு நடவடிக்கைகளைக் கண்டு அதிர்ச்சி அடைந்து, சினம் கொண்டு ‘கேரளம் ஒரு பைத்தியக்கார விடுதி’ என்று கருத்து தெரிவிக்கும் அளவிற்கு மூடநம்பிக்கைகளின் கூடாரமாக விளங்கியது.

கேரளாவின் சனாதன ஆதிக்கச் சக்திகளால் அடக்குமுறைக்கு ஆளான ஒடுக்கப்பட்டவர்களின் போராட்டமாகத் தொடங்கிய வைக்கம் போராட்டம், இந்திய அளவில் கவனத்தை ஈர்த்த ஓர் உரிமைப் போராட்ட நிகழ்வாக வரலாற்றில் பதிவாகியுள்ளது. பின்னாளில் இந்தியாவில் நிகழ்ந்த பல கோவில் நுழைவுப் போராட்டங்களின் துவக்கப்புள்ளி தான் இந்த வைக்கம் போராட்டம். அண்ணல் அம்பேத்கர் 3.3.1930 அன்று முன்னெடுத்த, நாசிக் நகரில் உள்ள காலாராம் கோயில் நுழைவுப் போராட்டமும், வைக்கம் போராட்டம் தந்த தாக்கமே. இப்போராட்டத்தில் பெரியாரின் பங்களிப்பு இன்றியமையாதது என்பதை இக்கட்டுரை விவரிக்கிறது.