மனித இனத்தின் வரலாற்றில் ஆட்சிமுறை என்பது எப்படித் துவங்கியது என்பதை விளக்கும் இக் கட்டுரை, இந்தியப் பெருங்கண்டத்தில் நிலவிய திராவிட ஆட்சிமுறையின் கருத்தியல் மாண்புகளை எடுத்துக் கூறி, அந்நாளில் மக்களாட்சி நிலவாவிடினும், குடிமக்களின் கருத்துக்களுக்கு மதிப்பளித்துக் குடிமை மிக்க ஆட்சிமுறையாகவே திராவிட மன்னராட்சி பலவும் விளங்கிற்று என்பதை எடுத்துக் காட்டுகிறது. மாறாக, ஆரிய ஆட்சிமுறை எப்படித் தனிப்பட்ட குடும்ப ஆட்சிக் குலமுறையாகத் துவங்கிற்று என்பதையும் ஒப்பிட்டுக் காட்டி, ஆட்சிமுறை அரசியல் முறைமைகளை உலகளாவிய பார்வையில் இக்கட்டுரை விளக்குகின்றது.

இது இந்தியா விடுதலை அடைவதற்குச் சற்று முன்னர் (மே 1947) எழுதப்பட்டு, ’குடியாட்சியின் தோற்றமும் வளர்ச்சியும்’ என்ற நூலாக வெளிவந்த பதிப்பின் ஒரு பகுதியாகும். அதனைத் திராவிடப் பொழில் ஆய்விதழில் மீள்பதிப்பிக்கின்றோம்.

பன்மொழிப் புலவர் கா. அப்பாதுரையார் மற்றும் திராவிட ஆசான் சாமி சிதம்பரனார் அவர்கள் இணைந்து எழுதிய இந்நூலின் பகுதிகள், இன்றைய தலைமுறையின் ஆய்வியல் நோக்குக்கு உதவியாக அமையும் என்று கருதியே இப்பதிவினைத் திராவிடப் பொழில் ஆய்விதழ் மீள்வெளியிடுகின்றது.