நற்றிணைப் பாடல்கள் எழுதப்பட்ட காலச் சூழலும், மக்கள் வாழ்நிலையும் காலத்தால் முந்தியது. மிகவும் பழமையானது. அவ்வாறிருக்க, தற்காலத்தில் எழுந்துள்ள மக்கள் எழுச்சிச் சிந்தனைகளான -இசங்கள் 19,20ஆம் நூற்றாண்டில் தோன்றியவை. இருப்பினும் எல்லா -இசங்களும் தோன்றுவதற்கு முன்பே, ‘புத்தர்’ மனிதநேயக் கொள்கைகளை அனைத்து மக்களுக்காக உருவாக்கி, மக்களிடையே சென்றடையச் செய்தார். அது புத்திசமாக உருவானது. எல்லா வகை -இசங்களும் சொல்லும் செய்தி ஒன்று தான் - எல்லா மக்களும் சமம்; எந்த நிலையிலும் உயர்வு தாழ்வு இல்லை என்பதே. மார்க்சியம் என்பது பொருளாதாரச் சமத்துவக் கொள்கை. பெண்ணியம் என்பது பாலினப் பேதமற்ற சமத்துவம். பெரியாரிசம் என்பது பிறவிப் பேதமற்ற - சமத்துவமும், சுயமரியாதையும் கலந்த மனிதநேயக் கொள்கை ஆகையால், பெரியாரிசத்தை அடிப்படையாகக் கொண்டு நற்றிணையை ஒப்பிட்டு ஆய்வது இவ்வாய்வின் முக்கிய நோக்கமாகக் கருதப்படுகிறது.

காலத்தால் பழைமை வாய்ந்த பண்டைத் தமிழரின் வாழ்வில், தற்கால -இசங்களுடன் எவ்வாறு ஒத்துப் போகும்? அதனை ஒப்பிடுவது சரிதானா? என்ற கேள்வி எழுவது இயற்கை. சங்க இலக்கியங்கள் சொல்வது மக்களின் அற்றைக் கால வாழ்வியல். -இசங்கள் சொல்வது மனிதனின் தனிமனிதச் சுதந்திரமும் உரிமையும் ஆகும். ஆகவே, அன்றைய கால வாழ்க்கையில் இத்தகைய சமமான தன்மையுடன் வாழ்க்கையை மனிதர்கள் வாழ்ந்தார்களா? என்பதே ஆய்வின் அடிப்படைப் பொருண்மைகளாகும்.