போலிச்செய்திகள் என்பவை செய்தி என முன்னிறுத்தப்படும் பொய்யான அல்லது தவறாக வழிநடத்தக்கூடிய தகவல்கள் ஆகும். தற்காலத்தில் தவறான தகவல் (Mis-information), திரிபுபடுத்தப்பட்ட தகவல் (Dis-information), தீங்கான தகவல் (Mal-information) எனும் மூன்று பிரதான பிரிவுகள் போலிச்செய்திகளில் உள்ளடங்குகின்றன. ஊடகத்துறையின் செல்நெறியில் தவறான தகவல்களும் திரிபுபடுத்தப்பட்ட தகவல்களும் எப்பொழுதும் இருந்து கொண்டேயிருந்த போதும், கடந்த சில ஆண்டுகளிலேயே அவை பல்கிப்பெருகியுள்ளமை அவதானிக்கப்பட்டுள்ளது.

தற்காலத்தில் ஊடகங்கள் எண்ணிக்கையில் அதிகரித்துக் காணப்படும் நிலையில், அவற்றிலிருந்து பரவுகின்ற போலிச்செய்திகளின் எண்ணிக்கையும் அதிகரித்துள்ளமை ஒரு பாரிய பிரச்சினையாக நோக்கப்படுகின்றது. இவற்றின் காரணமாக சமூகத்தில் ஏற்படும் தாக்கத்தினால் பொதுமக்கள் பாதிப்புறுவதுடன் சமூக அமைதி, இனங்களுக்கு இடையேயான நல்லுறவு போன்றனவும் கெடுகின்றன. இந்நிலையில் பிராந்திய ரீதியில் அடையாளம் காணப்பட்ட சமகால போலிச்செய்திகளின் இயல்பு, போக்கு, நோக்கம் முதலானவை ஆய்வுக்கு உள்ளாக்கப்படவேண்டிய அவசியம் உணரப்பட்டுள்ளது.

சமூகவலைத்தளங்களில் பரப்பப்படுவனவும் இலங்கை சார்ந்தனவுமான சமகாலப் போலிச் செய்திகளை அடையாளம் காணும் பணிகள் பல்வேறு தரப்பினராலும் முன்னெடுக்கப்படுகின்றன. "Fact Seeker" எனும் பெயரிலான செயற்றிட்டமூடாக இலங்கை பத்திரிகை ஸ்தாபனத்தினால், 01.02.2021 ஆம் திகதியிலிருந்து 13.10.2021 ஆம் திகதி வரையான காலப்பகுதியில் அடையாளம் காணப்பட்ட 151 செய்திகளை பிரதான ஆதாரமாகக் கொண்டு சமூக வலைத்தளங்களில் பரவுகின்ற சமகாலப் போலிச்செய்திகளை ஆராய்வதை இக்கற்கை தனது நோக்கமாகக் கொண்டுள்ளது. தரவுகளைத் திரட்டியும் பகுத்தும் நோக்குவதற்கு பகுப்பாய்வு முறையியலும் விபரிப்புச் செயற்பாட்டிற்கு விபரண ஆய்வு முறையியலும் பயன்படுத்தப்படுகின்றன.

இலங்கை சார்ந்த சமகாலப் போலிச்செய்திகளது இயல்புகள், விடயப்பரப்புகள், பின்னணி, போக்கு ஆகியவை எவை என்ற ஆய்வுப் பிரச்சினையை முன்வைத்து, இதுதொடர்பில் ஏற்பட்டுள்ள ஆய்விடைவெளியை நிரப்பும் நோக்குடன் இக்கற்கை முன்னெடுக்கப்படுகின்றது.